“ڨياسيات العودة المدرسية”2
On 6 أكتوبر، 2025 by sarraذكريات دخول المكتب (2)
إعادة نشر لمن لم يتنسى له قراءة هذه الخواطر
ايا قلنا مشيت مع الوالد باش ياخذلي صباط …حانوت الصبابطي فيها برشا حركة …شرّايا و صناع و باكوات و صبابط على كل لون يا كريمة ..قلنا مولى الحانوت حبيب الوالد ..حطلو كرسي قدام الكونتوار متاعو و أنا كي العنكبوتة عامل فيها عاقل..مرة نسرق السمع لحديثهم و مرة نلعّب عيني على الكليانتية…الجو في البلاد سخون حرب بنزرت محسوب ما زالت كي وقفت و دخلت تونس في مفاوضات مع فرانسا… على ذكر حرب بنزرت … كانوا سكان الحوم العربي بالاخص جماعة الرحيبة و نهج حميدة بلخوجة و نهج بوغدير و النفافتة و عين دوارة و سيدي البهلول و باب الأقواس و القعادين و سيدي البهلول و الطربخانة اللي قراب من سبيطار الفرنسيس ( شارل نيكول ) ساعة ساعة يهدوا باش يتفرجوا في الكماين اللي معبين بالموتى(الشهداء) كانوا يعديو اكثرهم لمحل تابع البلدية مقابل السبيطار و مجانب دار الشريف و من آخر الحيط متاع البنية يبدا نهج باب العلوج.. اللي من بعد ولى ادواش بلدية و يداويو فيه الجرب حاشاكم و هذي حكاية توة يجي وقت و نفصلوها..عاد كانو يهبطوا الجثث غادي و يغسلوهم…و يحكيو و الثبات ثبات صغر قالوا اللي غادي يغسلوهم و يكفنوهم و طول يهزوا يدفنوهم في جبانة الجلاز…
عاد الحديث اللي دار بين الوالد والصبابطي على حرب بنزرت …كانك من الوالد رأيو اللي الحرب في حد ذاته مغامرة ما كانتش محسوبة و برشا شبيبة مشات زيزي يعبيو فيهم من كل بر و هز و ارمي في افام المدافع و كانك من الصبابطي رأيو اللي الحرب كان لا بد منها و اللي عرضوا صدوراتهم للكرتوش هوما الحرس الوطني ( حديث عهد )… و سخن النقاش بيناتهم هذا يقول نعرفك أنت بورڨيبي و الآخر يقلو يا جماعة بن يوسف …في وسط حديثهم نادى الصبابطي على صانع من الصناع و جاب للوالد قهوة فيلتر و حب ياخذ لي ڨازوزة قالو الوالد لا ما اتعبش نفسك الڨازوز يقلقو و زيد يشرب في الدواء …ههه ..الصغير ماو يقولوا النصيحة في الصغر كما النقش في الحجر …مشى زمان و جاء زمان و كبرت و تنجم تقول لحتى لعمري هذا ..كيف حد من العائلة و ألا من الاحباب تواتي و يضرب وقت الفطور و أنا في محلو ..نعتذر و نقول سامحوني عندي دواء نشرب فيه…
بعد ما كملوا الحكايات و النقاشات متاعهم تلفت لي الصبابطي و قالي ” ولدي شنوة نوع الصباط اللي شاهيه” …جاوبو الوالد في بقعتي شوفلنا زوزين صباط نعال و جلدهم متين و نص قصبة بالربايط..
من حينك في رمشة واحد من الصناع جبد السلوم و تعنكش و طلع و بدا يمد في باكوات الصبابط…جبدني الصانع من يدي و قعدني على طابوري وبدأ يجب و يمد و يحل..و الوالد يشد و يقلب..شد قيسلو هذا … حل الصانع الربايط و جبد فردة و بدأ يدخل لي ساقي في الصباط بالغصب و أنا نتوجع و مسكر فمي و هالشلبوق يجيه على العنڨرة متاعو من تالي ..
الصبابطي” يا قرضة ماكش تشوف في ساقو عرقانة من الصندال الكواتشو اللي لابسو.. جيب “سوكات ” socquette هي التسمية متاع الكلاسط القصيرة في هاك الوقت…المختصر قست الأول و الثاني …الثالث خطف …رجع الصانع الصباط في باكوه ..و تقدم الوالد باش يخلص …قالو الصبابطي يا سي محمود خلّي من بعد برّا اعمل دورة في السوق أنت و العازب ما دام بعثت أنا الصباط للملاخ باش يركبلو صفايح…. قبل كان الصبّاط يتصفّح في الاقدام و على جنب باش يدوم أكثر..أما زلقتو بفلقة
